ساپاردىڭ ماڭىزدى وقيعالارىنىڭ ءبىرى – راحات اۋىلىندا 1200 ورىندىق №25 جاڭا مەكتەپتىڭ اشىلۋى. ءبىلىم وشاعى پرەزيدەنت قاسىم-جومارت توقاەۆتىڭ باستاماسىمەن جۇزەگە اسىرىلىپ جاتقان «كەلەشەك مەكتەپتەرى» ۇلتتىق جوباسى اياسىندا سالىندى. مەكتەپ 61 ارنايى كابينەتىمەن جابدىقتالعان, ونىڭ ىشىندە STEM زەرتحانالارى, روبوتوتەحنيكا, ديزاين جانە تەحنولوگيا, مادەنيەت جانە ونەر, تاماقتانۋ مادەنيەتى, ينكليۋزيۆتى ءبىلىم بەرۋ كابينەتتەرى بار.
جەدەل مەديتسينالىق كومەكتىڭ ماتەريالدىق-تەحنيكالىق بازاسىن نىعايتۋ ماقساتىندا وبلىس اكىمى جاڭاوزەن قالالىق جەدەل جاردەم ستانتسياسىنا زاماناۋي مەديتسينالىق قۇرالدارمەن جابدىقتالعان بەس جاڭا Hyundai Staria اۆتوكولىگىن تابىستادى. بۇل جەدەل كومەكتىڭ ساپاسى مەن تيىمدىلىگىن ارتتىرۋعا مۇمكىندىك بەرەدى.
نۇرداۋلەت قيلىباي ساپار اياسىندا وڭىردەگى ءىرى الەۋمەتتىك جوبالاردىڭ جۇزەگە اسىرىلۋ بارىسىمەن دە تانىستى. ول 350 بالاعا ارنالعان قوسىمشا ءبىلىم بەرۋ ورتالىعى سانالاتىن «Bolashaq Saraiy» وقۋشىلار ورتالىعى عيماراتىنىڭ قۇرىلىسىن ارالادى. ورتالىقتا زەرتحانالار, IT-سىنىپتار, تەلەستۋديا, شىعارماشىلىق شەبەرحانالار, اكت زالى جانە كوۆوركينگ ايماقتارى قاراستىرىلعان. اكىم نىساندى بەلگىلەنگەن مەرزىمدە اياقتاۋدى تاپسىردى.
سونىمەن قاتار, وبلىس اكىمى جىل باسىندا اشىلعان كوپفۋنكتسيونالدى «مۇز ايدىنى» سپورت كەشەنىنىڭ جۇمىسىن باعالادى. مۇز ارەناسى وڭىردە قىسقى سپورت تۇرلەرىن دامىتۋعا ايتارلىقتاي سەرپىن بەردى. مۇندا حوككەي, مانەرلەپ سىرعاناۋ, شورت-ترەك جانە كەرلينگ سەكتسيالارى جۇمىس ىستەيدى, سونداي-اق جاتتىعۋ پروتسەسىنە قاجەتتى ينفراقۇرىلىم تولىق قامتاماسىز ەتىلگەن.
الەۋمەتتىك نىسانداردى ارالاعاننان كەيىن نۇرداۋلەت قيلىباي مۇمكىندىگى شەكتەۋلى ازاماتتاردىڭ ۇيلەرىنە بارىپ, ولاردىڭ تالاپ-تىلەكتەرىن تىڭدادى. جاۋاپتى مەملەكەتتىك ورگاندارعا قولجەتىمدى ورتا قۇرۋ, ازاماتتاردىڭ سۇرانىسى بويىنشا تومەنگى قاباتتارعا كوشىرۋ ماسەلەسىن شەشۋ جانە ينۆاتاكسي قىزمەتىن كەڭەيتۋ بويىنشا تاپسىرمالار بەردى.
وسىدان كەيىن ايماق باسشىسى كەندىرلى اۋىلىندا جەرگىلىكتى ءوزىن-ءوزى باسقارۋدى نىعايتۋ ماقساتىندا سالىنعان جاڭا اۋىلدىق اكىمدىك عيماراتىنىڭ اشىلۋىنا قاتىستى. سونىمەن قاتار كەندىرلى, قىزىلساي, تەڭگە جانە راحات اۋىلدىق وكرۋگتەرىنە قىزمەتتىك اۆتوكولىكتەر تابىستالدى. بۇل اۋىلدىق اكىمدىكتەردىڭ جۇمىس تيىمدىلىگىن ارتتىرۋعا مۇمكىندىك بەرەدى.
ساپار سوڭىندا وبلىس اكىمى جاڭاوزەندە العاش رەت ۇيىمداستىرىلعان دزيۋدودان جاستار اراسىنداعى قازاقستان چەمپيوناتىنىڭ اشىلۋ راسىمىنە قاتىستى. جارىسقا ەلىمىزدىڭ بارلىق وڭىرىنەن 600-دەن استام سپورتشى جينالدى. نۇرداۋلەت قيلىباي ءوز سوزىندە پرەزيدەنت تاپسىرماسىنا سايكەس وڭىردە بۇقارالىق جانە جاسوسپىرىمدەر سپورتىنا ەرەكشە كوڭىل ءبولىنىپ, زاماناۋي سپورت ينفراقۇرىلىمى جۇيەلى تۇردە دامىپ جاتقانىن اتاپ ءوتتى.
جۇمىس ساپارى جاڭاوزەن مەن اۋىلدىق وكرۋگتەردىڭ الەۋمەتتىك سالاسىن دامىتۋعا تىڭ سەرپىن بەرىپ, تۇرعىنداردىڭ ءومىر ساپاسىنا اسەر ەتەتىن وزەكتى ماسەلەلەردىڭ شەشىلۋىنە ىقپال ەتتى.
